Bo día a todas e todos!
Hoxe vimos falarvos da fantástica xornada de bibliotecas escolares de Galicia, que tivo lugar o pasado sábado, 9 de novembro, no pazo de congresos de Santiago de Compostela.
A xornada comezou cunha charla moi divertida e interesante da man da xenial Paula Carballeira, falando de teatro e vida, na que rimos e reflexionamos sobre a importancia do xogo na aprendizaxe e, en xeral, na vida.
Despois da pausa para un cafeciño, asistimos á mesa de experiencia de centros sobre redes de bibliotecas, na que tivemos a representación de Ana Díaz, coordinadora da microrrede da Mariña, que fixo un traballo espléndido contando como funcionamos e os proxectos que estamos levando a cabo. A outra ponente, Cristina Campos, de A Lama, falounos do seu lindo proxecto, tamén en rede, chamado Letras na praza, no que os rapaces de distintos centros de educación primaria reúnense cada ano na praza do concello para facer actividades moi orixinais que fomentan a lectura.
A seguinte charla, de Rosalía Fernández, aportounos técnicas, formas de levar o teatro ás aulas e aproveitar as opcións que nos ofrece. Orientounos para saber onde situalas nos "portos mentais" do alumnado, utilizando as artes para xerar asociacións ou "darlle un decorado" que facilite a aprendizaxe.
Trala pausa para comer, asistimos á mesa de experiencia de centros do teatro, con Xurxo Manuel Souto, do IES Isidro Parga, e María Sagrario Torrado, do IES Arcebispo Xelmírez, que nos fixeron, xunto cos seus compañeiros, pasar un moi bo rato meténdonos en escena coa Pizza de Eneas e rindo coas anécdotas das experiencias teatrais dos seus centros.
Para rematar, reflexionamos con Manuel Núñez Singala coa súa conferencia sobre o teatro e a xuventude.
📚Foi unha xornada moi dinámica e interesante, volveremos o ano que ven!📚