Cada 5 de outubro celébrase en todo o mundo o Día das e dos Docentes, unha data creada pola UNESCO e a OIT no ano 1994 para recoñecer o valor e a importancia do labor docente na sociedade. A escolla desta data conmemora a aprobación, en 1966, da Recomendación sobre a Situación do Persoal Docente, un documento que estableceu as bases dos dereitos, responsabilidades e condicións necesarias para garantir unha educación de calidade.
Máis tarde, en 1997, aprobouse tamén a Recomendación sobre o Persoal Docente do Ensino Superior, que ampliou estes principios ao ámbito universitario e da investigación.
Este día serve para render homenaxe a todas as persoas que se dedican ao ensino, que acompañan e inspiran xeración tras xeración, e que con esforzo e adicación contribúen a transformar o mundo a través da educación.
É tamén unha ocasión para reflexionar sobre o papel do profesorado no presente e no futuro, sobre o apoio e os recursos que necesita para desenvolver plenamente a súa tarefa, e sobre os desafíos que afronta unha profesión esencial para o progreso e a igualdade.
O Día Mundial das e dos Docentes celébrase en colaboración coa UNESCO, a Organización Internacional do Traballo (OIT), UNICEF e a Internacional da Educación, entidades que lembran cada ano a importancia de recoñecer, respectar e apoiar a docencia como base fundamental de toda sociedade democrática.
Dende a Biblioteca do IES Vilar Ponte sumámonos a esta celebración agradecendo o compromiso, o esforzo e adicación diaria de todo o profesorado, que coa súa entrega contribúe a facer da educación unha verdadeira ferramenta de cambio e de futuro.