En memoria de Jane Goodall
Onte faleceu aos 91 anos Jane Goodall, unha das voces máis admiradas e influintes na defensa da natureza e dos animais. A súa vida foi un exemplo de paixón, constancia e compromiso co coñecemento e coa vida en todas as súas formas.
Nacida en Londres en 1934, Jane Goodall chegou a Tanzania con apenas 26 anos, movida pola curiosidade e o amor polos animais. Sen formación académica formal en bioloxía naquel momento, iniciou un estudo pioneiro sobre os chimpancés do parque nacional de Gombe, que acabaría revolucionando a ciencia.
Foi ela quen descubreu que os chimpancés son capaces de crear e empregar ferramentas, de organizar complexas relacións sociais e de manifestar emocións como o afecto, a dor ou a solidariedade. Estes descubrementos obrigaron a redefinir o concepto de humanidade e a recoñecer que as fronteiras entre as especies son moito máis difusas do que se pensaba.
Ao longo da súa vida, Goodall combinou o traballo científico coa defensa activa da natureza e dos dereitos dos animais. Fundou o Instituto Jane Goodall e impulsou o programa Roots & Shoots, a través do cal miles de mozos e mozas de todo o mundo participan en accións ambientais e humanitarias.
A súa voz, calma pero firme, recordounos sempre que o planeta é un fogar compartido, e que o respecto e a empatía son o camiño para garantir o seu futuro.
Hoxe, desde a biblioteca do IES Vilar Ponte, queremos rendirlle homenaxe e agradecerlle unha vida adicada á observación, á paciencia e á defensa da vida.
As súas palabras seguen vixentes:
“Cada un de nós marca unha diferenza. Cada día temos que decidir que tipo de diferenza queremos marcar.”
O mellor tributo que podemos facerlle é seguir aprendendo a mirar o mundo con curiosidade e coidar del con responsabilidade.