%20copia.jpg){kind=link}
Este curso, as bibliotecas escolares convídannos a mirar o mundo con outros ollos: os do deseño. Porque detrás de cada libro, cartel, páxina web ou portada hai unha historia feita de decisións, cores, letras e ideas. E tamén moita creatividade.
O deseño acompaña á lectura desde o principio dos tempos. As primeiras letras gravadas na pedra, os tipos móbiles, as cubertas ilustradas, os carteis que nos fan parar e mirar... todo é deseño, todo é comunicación visual. Este curso queremos abrir a biblioteca a ese universo, explorar como se constrúe unha páxina, como se escolle unha tipografía, como se pensa un cartel ou se crea unha marca.
Falaremos de editoriais galegas pioneiras, como Nós ou Ediciós do Castro, e tamén de artistas do deseño e do cartelismo, como Xosé Vizoso, que fixeron da imaxe unha forma de contar o noso tempo.
Desde o IES Vilar Ponte propoñemos facer da biblioteca un laboratorio de ideas, un espazo para experimentar, combinar palabras e imaxes, xogar coa cor e coas formas, crear libros, carteis ou portadas imaxinadas… unha auténtica viaxe á creatividade.
O cartel deste ano, deseñado por Desescribir, recórdanos que todo comeza pola raíz: o alfabeto. Cada letra é unha pequena ferramenta para construír mundos. A partir delas, todo é posible.
